Tamil Christian Songs: வருவார் விழித்திருங்கள் இயேசு நாதர்

09 December 2025

மேலும் அதிக பாடல்களுக்கு

126. இராகம்: சௌராஷ்டிரம் ஆதிதாளம்

பல்லவி

வருவார் விழித்திருங்கள்;-இயேசுநாதர்

வருவார் விழித்திருங்கள்.

அனுபல்லவி

பெரியவர், சிறியவர், பேதையர், மேதையர்[1]

சருவர்க்கும் நடுத்தீர்த்துத் தகு பலன் அளித்திட. - வரு

சரணங்கள்

1. பேரிகையால்[2] அண்ட பித்திகளும்[3] குலுங்க,

பேர் எக்காளத் தொனியால் பேய்க் கணங்கள் கலங்க,

தாரணியோர் மலங்க[4], தமைப் பற்றினோர்களும்

சீர்நிறை தூதரும் சேர்ந்து சூழ்ந்திலங்க. - வரு

2. வானம் மடமடென்க, வையம் கிடுகிடென்க,

ஈனப் பேயைச் சேர்ந்த எவரும் நடுநடுங்க,

மானம் இன்றி வாழ்ந்த மா பாதகர் அடங்க,

ஞான கானம் பாட நல்லோர் சபை தொடங்க. - வரு

3. துன்புற்றோர்க்கு ஜீவ இன்பக் கனிகள் ஊட்ட

தொண்டு செய்ய அன்பர்க்கு அண்டர்[5] முடிகள் சூட்ட,

அன்பற்றோரை நரகவன்புத் தீயில் வாட்ட,

அத்தனைச்[6] சேர்ந்தோரை நித்ய கதியில் கூட்ட - வரு

4. விசுவாசிகள் தமை மெச்சிப் புகழுதற்கும்,

மேலா மோட்ச தலத்தோர் சால மகிழுதற்கும்,

விசுவாச ஈனரை வியவா திகழுதற்கும்,

விண்ணோர் குழாங்கள் சூழ, அண்ணல் கிறிஸ்தரசர் - வரு

- தேவவரம் முன்ஷி

[1] புலவர்

[2] முரசு

[3] சுவர்கள்

[4] நிலை கலங்க

[5] அண்டர்

[6] இறைவன்