ஞான சுவிசேடமே நன்மை

144. இராகம்: பிலகரி                                        செம்படைதாளம்

 

                             பல்லவி

 

                   ஞான சுவிசேஷமே

                        நன்மை தரும் நேசமே

 

                             அனுபல்லவி

 

                        ஞான உபதேசமே, வளரும் விசுவாசமே, - ஞான

 

                             சரணங்கள்

 

1.         சத்திய வாக்கியமே, சந்தோச பாக்கியமே,

            புத்தியா ரோக்கியமே, புண்ணிய சிலாக்கியமே. - ஞான

 

2.         நீதிப் பிரசங்கமே, நிமலன் அருள் தங்கமே,

            சோதிமிகும் துங்கமே,[1] துதிபெருகும் பொங்கமே,[2] - ஞான

 

3.         அஞ்ஞானத்தை அழிக்கும், அலகையிடர் ஒழிக்கும்,

            மெய்ஞ்ஞானத்தை அளிக்கும், விளங்கி என்றும் செழிக்கும், - ஞான

 

4.         யேசுவண்டையில் சேர்க்கும், எல்லா இடரும் நீக்கும்,

            பேசும் பாவத்தைப்போக்கும், பேதைமையோரைக் காக்கும் - ஞான

 

- ஜே. பால்மர்

 

---

[1] தூய்மை

[2] பொலிவு-ஆனந்தம்