மானுவேல் தொண்டரே ஆர்ப்பரித்து

மானுவேல் தொண்டரே

374. உசேனி                                        ரூபகதாளம் 

பல்லவி

                   மானுவேல் தொண்டரே!-ஆர்ப்பரித்து

                   மகிழ்ந்து பூரிப்போம்.

அனுபல்லவி

            மானிலமீது சமாதானமா மென்ற

            வானவர் வாழ்த் துதவறா தென நம்பும்,

            நானிலமெங்கும்[1] சகோதர ஐக்கியம்

            நண்ணும் பகலருணோதயம் ஆகுதே:

                        நாடுவோம்,-அதைத் தேடுவோம்,-இனி

                        நாமுமுயற்சி கையாடுவோம், பாடுவோம். - மானு

சரணங்கள்

1.         தீர்க்க ருரைப்படியே-உலகெங்கும்

            தீங்கிலாக் காலம் வரும்:

            தாக்கும் படைக்கலங்கல்-கிருஷிகச்

            சாதனமாகி விடும்:

            மாக்க ளெலாமொரே தந்தையின் மக்களாய்,

            மன்னன் யேசுவுக்கு ளொன்றான தோழராய்,

            வாக்குவாதங்கள், வழக்குகள், யுத்தங்கள்

            நீக்கி யிணக்கம் பொறுமை நற்குணங்கள்

                        நிலைத்து,-அன்பு-வளர்த்துக்,-கரங்

                        கொடுத்து,-உற வடுத்துமதிப்பர். - மானு

2.         போன காலங்களிலே-நடந்திட்ட

            பொல்லாங்கும் பாடுகளும்,

            ஈனத் துரோகங்களும்,-விளைவித்த

            ஈங்கிசைபோதும் இனி

            வானபரனின் மலரடிக் கண்ணுற்று,

            வல்ல பரிசுத்த அன்பினாவி பெற்று,

            மற்றுமவர் செய்கை மாதிரி நாம் கற்று,

                        மாட்சியாய்,-அவர்-சாட்சியாய்,-இந்த

                        மண்ணிலத்தார் ஒத்து வாழச் செபித்துமே. - மானு

3.         சர்வ ஜனநேசம்-நிறைவுறத்

            தாமதமானாலும்,

            கர்வம் பொறாமை பகை-தடை செய்யக்

            காலம் நீடித்தாலும்,

            அருள் நம்பிக்கை கொண்டற்பமெனு நம்மால்

            ஆனதைச் செய்குவோம் முன்தூதர் போலவே

            இருளகல விடிவெள்ளி தோணுது;

            எங்கும் நடுப்பகல் மங்களநாள் வரும்

                        யேசுவே,-இக-மாசுடர்-அவர்

                        நேசமே,-புவித்-தோஷமகற்றிடும். - மானு

- ஜி.சே. வேதநாயகம்

---

[1] பூமியெங்கும்