கர்த்தர் பிறந்தார் உத்தமர் மகிழ்வார் துத்தியம் செய்வோமே

15.         காம்போதி (அன்பரே என்னுட தோழரே)  ஏகதாளம்

1.       கர்த்தர் பிறந்தார் உத்தமர் மகிழ்வார் துத்தியம் செய்வோமே - நாம் நாம்

            காவலவர் தாம் பாவிகள் நமக்கு களித்திடுவோம் நாமே

2.         சத்தமிட்டு இதயம் மகிழ்ந்து சுவாமியைத்துதித்திடுவோம் - ஏசு

            சகல பாவங்களையும் தீர்க்க தற்பரன் பிறந்தாரே

3.         பெத்தலேகேம் ஊரில்வந்து பிள்ளையாய் பிறந்தாரே - எளிய

            பேயின் தலையை நசுக்கவென்று பேதை போலானாரே

4.         தேவதூதர் வணங்கி நிற்க ஜெயமாய் பிறந்தாரே உலகில்

            தேவகோபம் தீர்க்கவென்று சிறியவரானாரே

5.         இடையர் வந்து பாதம் பணிந்தார் எழுந்திருப்போம் நாமே - இப்போ

            இஸ்ரவேலின் மகிமை இவரே இவரைத் தொழுதிடுவோம்

6.         சாலேம் நகரில் மேலோர் கூட்டம் தவித்துப் படுத்திருந்தார் - ஆகா

            திருச்செந்தூரின் ஜனங்கள் நாங்கள் சுவாமியை அறிய வந்தோம்

7.         வீட்டையும் விட்டு நாட்டையும் விட்டு தொழுவத்திலே பிறந்தார் - மாட்டு

            மேன்மை நமக்குக்கொடுக்கவென்று விரும்பிப் பிறந்தாரே

8.         சீலையுமின்றித் துணியுமின்றிச் சிலிர்த்துப்படுத்திருந்தார் - பாலன்

            கோலாகோலம் கந்தை மூடி குளிரை அனுபவித்தார்

9.         பாவிகள் நமக்கு பாக்கியம் தரவே பரனார் கருவமைத்தார்

            கூவி அழுதும் எடுப்பாரின்றிக் குளிரை அனுபவித்தார்