எல்லாம் இயேசுவே எனக்கெல்லாம் இயேசுவே

எல்லாம் யேசுவே

225. (212) சங்கராபரணம்                                ஆதி தாளம்

பல்லவி

            எல்லாம் யேசுவே,-எனக்கெல்லா மேசுவே.

அனுபல்லவி

            தொல்லைமிகு மிவ்வுலகில்-துணை யேசுவே. - எல்

சரணங்கள்

1.         ஆயனும் சகாயனும் நேயனும் உபாயனும்,

            நாயனும் எனக்கன்பான ஞானமண வாளனும், - எல்

2.         தந்தைதாய் இனம்ஜனம் பந்துளோர் சிநேகிதர்,

            சந்தோட சகலயோக, சம்பூரண பாக்யமும், - எல்

3.         கவலையில் ஆறுதலும், கங்குலிலென் ஜோதியும்,

            கஷ்டநோய்ப் படுக்கையிலே கைகண்ட அவிழ்தமும், - எல்

4.         போதகப் பிதாவுமென் போக்கினில் வரத்தினில்

            ஆதரவு செய்திடுங் கூட்டாளிமென் தோழனும், - எல்

5.         அணியும் ஆபரணமும் ஆஸ்தியும்-சம்பாத்யமும்

            பிணையாளியும்[1] மீட்பருமென் பிரிய மத்தியஸ்தனும், - எல்

6.         ஆன ஜீவ அப்பமும் ஆவலுமென் காவலும்,

            ஞானகீதமும் சதுரும் நாட்டமும் கொண்டாட்டமும், - எல்

- யே. ஞானமணி

---

[1] பொறுப்பாளி