வாரும் நாம் எல்லோரும் கூடி

நாம் கூடி மகிழ் கொண்டாடுவோம்

293. (4) சங்கராபரணம்                                             ஏகதாளம்

பல்லவி

                        வாரும் நாம் எல்லோரும் கூடி,

                        மகிழ் கொண்டாடுவோம்;-சற்றும்

                        மாசிலா நம் யேசு நாதரை

                        வாழ்த்திப் பாடுவோம். ஆ!

சரணங்கள்

1.         தாரகம்[1] அற்ற ஏழைகள் தழைக்க நாயனா,-இந்தத்

            தாரணி யிலே[2] மனுடவ தாரம் ஆயினார். - வாரும்

2.         மா பதவியை இழந்து வறியர் ஆன நாம்,-அங்கே

            மாட்சி உற வேண்டியே அவர் தாழ்ச்சி ஆயினார். - வாரும்

3.         ஞாலமதில்[3] அவர்க்கிணை[4] நண்பர் யாருளர்,-பாரும்

            நம் உயிரை மீட்கவே அவர் தம் உயிர் விட்டார். - வாரும்

4.         மா கொடிய சாவதின் வலிமை நீக்கியே,-இந்த

            மண்டலத்தி னின்றுயிர்த் தவர் விண்டலஞ்[5] சென்றார். - வாரும்

5.         பாவிகட் காய்ப் பரனிடம் பரிந்து வேண்டியே,-அவர்

            பட்சம் வைத் துறும் தொழும்பரை[6] ரட்சை செய்கிறார். - வாரும்

- யோ. பால்மர்

---

[1] ஆதரவு

[2] பூமியிலே

[3] உலகத்தில்

[4] ஒப்பு

[5] விண்தலம்

[6] அடியாரை