இயேசு நாமம் ஒன்றை நம்புவீர்

பல்லவி

                   இயேசு நாமம் ஒன்றை நம்புவீர்

                        பூலோகத்தாரே

சரணங்கள்

1.         இயேசு நாமம் ஒன்றை நம்பும்

            ரட்சண்யத்துக் கிதுவே ஸ்தம்பம்

            பேசும் வேறே நாமமெல்லாம்

            பேயின் வம்பும் தும்புமாகும்                    - இயேசு

2.         மூவரிலொருவருமாய்

            முத்தொழில் புரிவோருமாய்

            ஆவியாய் அனாதியாய்

            ரூப ரூப வஸ்துவான                             - இயேசு

3.         ஐயன் இயேசையா உரைத்து

            ஆரணத் தெழுதி வைத்து

            வையகம் புரக்கும் நாயன்

            தையல் தரும் தூயசேயன்                      - இயேசு

4.         பார்த்திபன் தாவீது குல

            கோத்திர கன்னிமரிபால்

            நேத்திரம் போல உதித்துத்

            தாத்திரி ரட்சகனாக                             - இயேசு

5.         பூதலத் தஞ்ஞான இருள்

            போக்கவே மெஞ்ஞான பெரும்

            ஜோதியாய் விளங்கி நிற்கும்

            நீதியின் சூரியன் ஆன                         - இயேசு

6.         பாவிகளீடேற மோட்ச

            பாக்கியம் பெறுவதற்காய்

            ஜீவன் விட்டுயிர்த்தெழுந்து

            சேணுலகுக் கேறிச்சென்று                     - இயேசு

7.         விண்டலத்தவர்கள் சூழ

            கண்டலகை பதறிவிழ

            மண்டலத்தைத் தீர்வை செய்ய

            கொண்டல் மிசை வரும் ராஜன்             - இயேசு