சுத்தபரன் சுத்த ஆவியே

சுத்தபரன் சுத்த ஆவியே

114. (67 L) ஆனந்தபைரவி                    ரூபக தாளம்

பல்லவி

                   சுத்தபரன் சுத்த ஆவியே நின்மாமகிமை

                   சொல்லவரம் எனக்கீவையே.

அனுபல்லவி

                        மெத்தவும் அசுத்தன் நானே

                        மேவினேன் நின் பாதந்தானே,

                        உத்தமனம் கெஞ்சுவேனே,

                        உன்னையல்லா லழிவேனே. - சுத்த

சரணங்கள்

1.         அடியேன் புத்திபலத்தினால் என் ஆத்மமீட்பர்

            அருளைப் பெறவும் போகுமோ?

            மிடியுறும் ஏழைச்சிஷ்டி தான் மனந்திரும்பி

            விசுவாசங் கொள்ளலாகுமோ?

                        கடினம் என் மனங்கல்லு,

                        கத்தா ஓர் வார்த்தை சொல்லு,

                        திடசீவன் வரக்கொல்லு,

                        சேவடி நீ சேர்த்துக்கொள்ளு - சுத்த

2.         சுவிசேடத்தின் தொனியினால் எனையழைக்கும்

            சுகிர்தந்தனை யானறிந்தேன்,

            உவந்தளிக்கும் வரங்களால் என் இதயத்துக்

            கொளிதருவதை யுணர்ந்தேன்.

           

                        அவமாகா மெய்விஸ்வாசம்,

                        அதனால் தூய்மை நன்னேசம்,

                        கவர்ந்துனைத் தொழும்பாசம்,

                        கனிந்தளித்தாய் நல்வாசம். - சுத்த

3.         பூமியெங்கும் உள்ள சபையை வரவழைத்துப்

            பொற்புற[1] விணைத்துச் சேர்த்துச்

            சாமியொளிதந்து தூய்மை அளித்துயேசு

            தற்பரனில் நித்தங்காத்து

                        க்ஷேமகரஞ்செய்யும் நேயா,

                        தின்மையைப் பகைக்குந் தூயா,

                        பாமரர்க்கு நற்சகாயா,

                        பார்த்திபா என்றென்றும் மாயா. - சுத்த

4.         நித்தமும் பவம் பொறுக்கிறாய் திருச்சபையில்

            நீதிதீர்வை நாளிலேயன்பாய்ச்

            செத்த விசுவாசிகளையும் என்னையும் உடல்

            ஜீவனோடெழுப்புவாய் இன்பாய்.

                        நித்திய ஜீவன் தருவாய்,

                        நின்மலன் யேசுவை மெய்யாய்ப்

                        பத்தியாகவே மனம்வாய்

                        பற்றினோர்க்கு மா தயவாய். - சுத்த  

- ஞா. சாமுவேல்

---

[1] மாட்சியுள்ள ஐக்யம்