ஐயையா நான் ஒரு மா பாவி

என்னை ஆண்டு நடத்துவீர்

122. (132) சயிந்தவி                                                ஆதி தாளம்

பல்லவி

                   ஐயையா, நான் ஒரு மா பாவி;-என்னை

                   ஆண்டு நடத்துவீர், தேவாவி!

சரணங்கள்

1.         மெய் ஐயா, இது தருணம், ஐயா;-என்றன்

            மீதிலிரங்கச் சமயம், ஐயா;

            ஐயையா, இப்போ தென்மேல் இரங்கி-வெகு

            அவசியம் வரவேணும், தேவாவி! - ஐயையா

2.         எனதிருதயம் பாழ்நிலமாம்;-ஏழை

            என்னைத் திருத்தி நீர் அன்பாகத்

            தினமும் வந்து வழி நடத்தும்,-ஞான

            தீபமே, உன்னத தேவாவி! - ஐயையா

3.         ஆகாத லோகத்தின் வாழ்வை எல்லாம்-தினம்

            அருவருத்து நான் தள்ளுதற்கு

            வாகான[1] சுத்த மனம் தருவீர்,-நீர்

            வல்லவராகிய தேவாவி. - ஐயையா

4.         பத்தியின் பாதை விலகாமல்,-கெட்ட

            பாவத்தில் ஆசைகள் வையாமல்

            சத்திய வேதப்படி நடக்க,-என்னைத்

            தாங்கி நடத்திடும், தேவாவி! - ஐயையா

5.         அன்பு, பொறுமை, நற் சந்தோஷம்,-என்

            ஆண்டவரின் மேல் விசுவாசம்,

            இன்ப மிகு மெய்ச் சமாதானம்,-இவை

            யாவும் தருவீரே, தேவாவி! - ஐயையா

6.         ஏசுகிறிஸ்துவில் நான் சார்ந்து,-அவர்

            இடத்திலேயே நம்பிக்கை வைக்க,

            மாசில்லாத் துய்யனே, வந்துதவும்;-நீர்

            வராமல் தீராதே, தேவாவி! - ஐயையா

- பாக்கியநாதன் தாவீது

---

[1] அழகான