மாட்சிமையானதோர் காட்சியைப் பார்க்கலாம்

மாட்சிமையான காட்சியைப் பார்க்கலாம்

62. (105) கேதாரகௌளம்                      ஆதிதாளம்

பல்லவி

            மாட்சிமையானதோர் காட்சியைப் பார்க்கலாம்,

                        வா,-ஆ! கல்

            வாரிச் சிலுவையில் வானவன் தொங்கின்ற

            மாட்சிமையானதோர் காட்சியைப் பார்க்கலாம், வா

அனுபல்லவி

          சூட்சமுறு தேவ சாட்சியாங் கற்பனை

            துய்யத்தை[1] நரர் மீறி - மகா

            துர்க்குணப் பேயின் தந்திரத்தினால்

            தூய்மை விட்டனர், வாய்மை கெட்டனர்;

            சுத்த கிறிஸ்தரசன்,-தேவனுட

            சித்தன், அமை சிரசன், மாந்தர்களின்

            துன்பத்தைப் போக்கவும், இன்பத்தைச் சேர்க்கவும்,

            தோஷஞ் செய்பாதகன் வேஷமாய்த் தொங்கின்ற - மாட்

சரணங்கள்

1.         எருசலை நகர் மருவுங் கல்வாரி

            என்னப்பட்ட ஒரு மேடு;-அதில்

            ஏசுக்கிறிஸ் தெனும் நேசமகத்துவன்

            எங்களுக்காய்ப்படும் பாடு-மரக்

            குருசில் ஏறியே சிரசில் முண்முடி

            கொண்டதும் நொந்ததும் நீடு - அப்போ

            கொற்றவன்[2] தன்முகம் சற்றேனுங் காட்டாத

            குறையதும் ஒரு பீடு;

            குருதி வடியவே, சுருதி முடியவே,

            பருதி மறையவே, திரையுங் கிழியவே,

            கொலைஞர் அவமதிக்க,-துஷ்டனாம்

            அலகை[3] மனங்கொதிக்க, கசப்புடன்

            கோனே, என்னை நீர் ஏனோ கைவிட்டீர்?

            கொடுக்கிறேன் ஜீவனை, எடுத்திடு மென்றழும் - மாட்சி

2.         பூலோகத்தாரே, இம்மேலான காட்சியின்

            புண்ணியத்தை வந்து பாரும்;-தேவ

            புத்திரன் பக்கத்தில் குத்துண்டு பாய்கின்ற

            புனித ரத்தமும் நீரும்-நமை

            மேலோகஞ் சேர்க்கின்ற சாலக்கிருபையின்

            விஸ்தார ஊற்றென்று சேரும்;-அதில்

            விழுந்து ஆத்துமம் முழுகிப் பாவந் தீ

            வினை அகன்றிட வாரும்;

            சீலமற்ற மாந்தர் கோல முற்ற வேந்தர்

            ஜீவனாதிபதி சாவினாலே நம்மைத்

            தெய்வ லோகஞ் சேர்க்க-நித்தியமாய்

            உய்யும் சுத்தோராக்கத்-தேவசுதன்

            செல்வக் கிறிஸ்தந்தக் கல்வாரி மேட்டினில்

            ஜீவன் துடிக்கத்தம் ஆவி விடுகின்ற - மாட்சி

---

[1] பரிசுத்தத்தை

[2] கடவுள்

[3] பேய்