இயேசு நாமமல்லாம் உலகினில்

வேறு நாமம் இல்லை

124. (151) வனஸ்பதி                           ஆதி தாளம்

பல்லவி

            யேசு நாமமல்லாம்-உலகினில்

            வேறு நாமம் இல்லை,-கிறிஸ்து

அனுபல்லவி

            தேசுலாவிய கேரூபீம்பணி

            திவ்ய வானவர் முனிவர் கண்மணி,

            மாசில்லாத மெய்ஞ்ஞான சிகாமணி,

            மதிக்கும் சத்திய வேத சிரோமணி - யேசு

சரணங்கள்

1.         வானமும் புவியும்-கதி-ரோன் மதி[1] உடுவும்[2]

            கானல் வரை[3] கடலும்-நர-ரான எவ்வுயிரும்

            தானே படைத்தருள் ஆதி காரணன்,

            சர்வ ஜீவ தயாபரா பூரணன்,

            ஈனர் வாக்குக் கெட்டாத மெய்யாரணன்,

            இலங்கும் வேத சங்கீத பாராயணன். - யேசு

2.         காவிலாத மேவை-செய்-தீவினையதனால்

            பூவின் மாந்தர் படும்-துயர்-தேவ கோபமற,

            பாவிகளைப் பரனோடுற வாக்கப்,

            பரம எருசலேம் நகர் சேர்க்க,

            மேவுமலகை அரணைத் தூளாக்க,

            மேதினியில் சமாதானம் உண்டாக்க. - யேசு

3.         பண்டு வேதியர்கள்-கைக்-கொண்ட மாமறையில்

            விண்ட நாமமல்லாமல்-உயர்-அண்ட மீதினிலும்,

            மண்டலத்திலும், ஆழி கீழிலும்

            மாருதம்[4] செலும் அட்ட திக்கிலும்,

            தொண்டர் கூக்குரல் எட்டும் தூரத்திலும்,

            துஷ்டர் வர விரும்பாத இடத்திலும். - யேசு

- ஈசாக்கு பாக்கியநாதன்

---

[1] சந்திரன்

[2] நட்சத்திரம்

[3] மலை

[4] காற்று