சீரேசு பாலன் ஜெயமனு வேலன்

சீரேசுபாலன் ஜெயமனுவேலன்

25. ஹம்சத்வனி                                                       ஆதிதாளம்

பல்லவி

                        சீரேசு பாலன் ஜெயமனு வேலன்

                        சீர் நாமத்தைத் தினமே போற்றுவோமே

அனுபல்லவி

                        பாராளும் வேந்தன் பகரொண்ணா மைந்தன்,

                        தாராள மாகத் தாமே மனுவான. - சீரேசு

சரணங்கள்

1.         எண்ணரும் பெருமான்               ஏழைச் சாயலாக

            மண்ணி லேகின                        மாட்சிமை யாலே,

            விண்ணவர்கள் போற்ற,             வெற்றிக்கவி சாற்ற

            வண்ணம்[1] பாடி நாம்                 மகிழ்ந்திட வேண்டாமோ? - சீரேசு

2.         உன்னத பரனுக்                        கொப்பில்லா மகிமை

            இந்நிலத்தினில்                       எழில்சமா தானம்,

            மன்னுயிர்கள் மீது                     மாபிரியம் ஓங்க

            தன்னுயிர் தந்த                        தயவை என்ன சொல்வோம்? - சீரேசு

3.         பாவப் பிணியாலே                     பாதகரைப் போலே

            சாபத்தை நம்மேல்                    நாம் தேடினோமே,

            கோபத்தை ஒழித்தே                குவலயத்தை[2] மீட்க

            தீபமாய் வந்த                           தேவமைந்தனான - சீரேசு

4.         நித்தனே, என் பாவம்                எத்தனையானாலும்

            சித்தம் உருகிச்                       சீர்கூற வேணும்,

            அத்தனே, உன் பாதம்              அண்டினேன் இப்போதும்;

            பத்தியாய் உனைப்                    பகருவேன் எப்போதும் - சீரேசு

-சா. பரமானந்தம்

---

[1]. இசைப்பாடல்

[2]. பூலோகத்தை