ஏன் இந்தப் பாடுதான்

ஏன் இந்தப் பாடுதான்

44. (91) செஞ்சுருட்டி                                             ஆதி தாளம்

பல்லவி

                   ஏன் இந்தப் பாடுதான்!-சுவாமி

                   என்ன தருவேன் இதற் கீடுநான்?

அனுபல்லவி

    ஆனந்த நேமியே[1] - எனை ஆளவந்த குரு சுவாமியே   - ஏன்

சரணங்கள்

1.         கெத்செமனே யிடம் ஏகவும்,-அதின்

            கெழு[2] மலர்க் காவிடை போகவும்,

            அச்சயனே, மனம் நோகவும்,-சொல்

            அளவில்லாத் துயரமாகவும், - ஏன்

2.         முழுந்தாள் படியிட்டுத் தாழவும்,-மும்

            முறை முகம் தரைபட விழவும்,

            மழுங்கத் துயர் உமைச் சூழவும்,-கொடு

            மரண வாதையினில் மூழ்கவும், - ஏன்

3.         அப்பா, பிதாவே, என்றழைக்கவும்,-துயர்

            அகலச் செய்யும், என்றுரைக்கவும்,

            செப்பும் உன் சித்தம் என்று சாற்றவும்,-ஒரு

            தேவதூதன் வந்து தேற்றவும், - ஏன்

4.         ஆத்துமத் துயர் மிக நீடவும்,-குழம்

            பாக உதிர வேர்வை ஓடவும்,

            சாத்திர மொழிகள் ஒத்தாடவும்,-உந்தன்

            தாசரும் பதந்தனை நாடவும். - ஏன்

- ஏசுதாசன் அண்ணாவியார்

---

[1]. கடல்

[2]. நிறமுள்ள