சத்தாய் நிஷ்களமாய் ஒரு சாமிய மும் இலதாய்

உன்னையல்லாமல் எனக்கார் துணை

1. சங்கராபரணம்                                                      ரூபகதாளம்

1.         சத்தாய் நிஷ்களமாய்[1] ஒருசாமிய மும்[2]இலதாய்,

            சித்தாய்[3] ஆனந்தமாய்த் திகழ்கின்ற திரித்துவமே,

            எத்தால் நாயடியேன் கடைத்தேறுவன் என்பவந்தீர்ந்-து;

            அத்தா, உன்னையல்லால் எனக்கார்துணை, யாருறவே?

2.         எம்மா விக்குருகி உயிரீந்து புரந்ததற்கோர்[4]

            கைம்மா றுண்டுகொலோ? கடைகாறுங் கையடையாய்,

            சும்மாரட்சணைசெய், சொல்சுதந்தரம் யாதுமிலேன்,

            அம்மான், உன்னையல்லால் எனக்கார்துணை, யாருறவே?

3.         திரைசேர் வெம்பவமாம் கடல்மூழ்கிய தீயரெமைக்

            கரைசேர்த் துய்க்க[5]வென்றே புணையாயினை[6] கண்ணிலியான்,

            பரசேன் பற்றுகிலேன்; என்னைப்பற்றிய பற்றுவிடாய்,

            அரசே, உன்னையல்லால் எனக்கார்துணை, யாருறவே?

4.         தாயே, தந்தைதமர், குருசம்பத்து நட்பெவையும்

            நீயே எம்பெருமான், கதிவேறிலை நிண்ணயங்காண்;

            'ஏயே' என்றிகழு உலகோடெனக் கென்னுரிமை?

            ஆயே, உன்னையல்லால் எனக்கார்துணை, யாருறவே?

5.         பித்தே றிச்சுழலும் ஜெகப்பேய்பிடித் துப்பவத்தே

            செத்தேன்; உன்னருளால் பிழைத்தேன்மறு ஜென்மமதாய்;

            எத்தோ ஷங்களையும் பொறுத்தென்றும் இரங்குகவென்-று

            அத்தா, உன்னையல்லால் எனக்கார்துணை, யாருறவே?

6.         துப்பார்[7] சிந்தையிலேன் மறைந்தீட்டிய[8] தொல்வினையும்

            தப்பா தேவெளியா நடுநாளெனைத் தாங்கிக்கொள்ள,

            இப்பா ருய்யவென்றே மனுக்கோலமெ டுத்த எங்கள்

            அப்பா உன்னையல்லால் எனக்கார் துணை, யாருறவே?

-எ.ஆ. கிருட்டிணன்

பாடல் வரிகளின் பொருள்:

சத்தாய் = சத்தியமாய்/மெய்யாய் (இருக்கிறவராய் இருக்கிற)

ஒருசாமிய மும் இலதாய், = ஒப்புமைக்கு வேறு எந்த சாமியும் இல்லாததாய்

அம்மான்=தந்தை/கடவுள்

அத்தா->அத்தன்= தகப்பன்

துப்பார் = தூயவர்

1)

சத்தியமாய்/மெய்யாய் (இருக்கிறவராய் இருக்கிற) எங்கும் நிறைந்திருக்கிற

ஒப்பான வேறு எந்த சாமியும் இல்லாத  / ஒப்பில்லா தன்மையுடையவராயிருக்கிற

சர்வ ஞானியாய் / அனைத்தையும் அறிந்தவராய் பேரின்பமாய் / மெய் ஆனந்தமாக திகழ்கின்ற

திரித்துவ தேவனே

நாயைபோன்ற கீழ்நிலையிலிருக்கும் நான் (தனியாக)

என்ன செய்து/எவ்வாறு/எப்படி என் பாவங்களை எல்லாம் தீர்த்து மீள முடியும்

(அவ்வாறு எனது பாவத்திலிருந்து மீள்வதற்கு)

அத்தா/அத்தன்/ தகப்பனே உன்னைவிட்டால் எனக்கு யார் துணை? யார் உறவு?

2)

எம் ஆவிக்கு / ஆன்மாவிக்கு  மனம் இறங்கி தன் உயிரையே கொடையாக கொடுத்து காப்பாற்றியதற்கு / இரட்சித்ததற்கு / மீட்டுக் கொண்டு வந்ததற்கு

ஏதாவது கைமாறு / பிரதிபலன் உண்டோ என்று கடை காறும் / உலகின் எல்லை எல்லாம் தேடியும் கிடைக்கவில்லை

சும்மா/விலையில்லாமல் என்னைக் காப்பாற்றும்/ இரட்சியும் என்று சொல்வதற்குகூட சுதந்திரம் எனக்கில்லை.

(அவ்வளவு பாவியானவன் நான்)

அம்மான்/தந்தையே/கடவுளே உன்னைவிட்டால் எனக்கு யார் துணை? யார் உறவு?

3)

பெருங்கடலாய் திரண்டுள்ள எம் பாவமாய் கடலிலே மூழ்கிய எம்மை

கரை சேர்த்து காப்பாற்ற தெப்பமாக/படகாக வந்த உம்மை

கண்ணில்லாதவனைப்போல/பார்வையற்றவனைப்போல் நான் பிடித்துக்கொள்ளவில்லை/பற்றவில்லை.

ஆனால், (இவ்வாறு உம்மை பற்றாது இருக்கிற)

என்னை நீர் கைவிடாது காப்பாற்றிக்கொண்டிருக்கிறீரே.

அரசே உன்னைவிட்டால் எனக்கு யார் துணை? யார் உறவு?

4)

தாயாக, தந்தையாக, உறவினராக, குருவாக, செல்வமாக, நட்பாக

என் பெருமானாகிய நீயே திகழ்கின்ற உம்மைவிட வேறு கதி/ஆதரவு எனக்கில்லை.

ஏயே என்று என்னை இகழும் இந்த உலகத்தோடு எனக்கு என்ன உரிமை உள்ளது.

(இந்த உலகோடு எனக்கு எந்த சம்மந்தமும் இல்லை)

ஆயே/ தாயை போன்றவரே உன்னைவிட்டால் எனக்கு யார் துணை? யார் உறவு?

5)

பித்துபிடித்து திரியும் உலகத்தின் பேயால் பிடிக்கப்பட்டு, என் பாவத்தால் செத்தேன்

உமது அருளால்/கிருபையால் மறு ஜென்மமாய் பிழைத்தேன்./மறு பிறப்பு அடைந்தேன்.

எல்லா பாவ தோசங்களையும் பொறுத்து எப்போதும் எனக்கு இரங்கும் என்றேன்

அத்தா/அத்தன்/ தகப்பனே உன்னைவிட்டால் எனக்கு யார் துணை? யார் உறவு?

6)

தூயவர்/கடவுள் இருக்கிறார் என்ற சிந்தை இல்லாமல், (உலகோர் கண்ணுக்கு) மறைத்து நான் இதற்குமுன் செய்த/பழைய வினை/தீயசெயல் தப்பாமல் வெளியாகும் நடுநாள்/நியாயத்தீர்ப்பு நாளிலே என்னை தாங்கிக் கொள்ள/ ஆதரித்து காப்பாற்றுவதற்கு

இந்த பார் உலகம் இரட்சிக்கப்படுவதற்காகவே மனித உருவம் எடுத்த

எங்கள் அப்பா உம்மைவிட்டால் எனக்கு யார் துணை? யார் உறவு

---

[1] ஓரிடமென்றில்லாமல்

[2] ஒப்புமை

[3] அறிவாய்

[4] காப்பாற்றியதற்கோர்

[5] தப்புவிக்க

[6] தெப்பமானாய்-படகானாய்

[7] தூய

[8] மறைந்து செய்த