என்ன பாக்கியம் எவர்க்குண்டு

என்ன பாக்கியம்

38. (53) சங்கராபரணம்                           ஆதிதாளம்

பல்லவி

                        என்ன பாக்கியம், எவர்க்குண்டு

                        இந்தச் சிலாக்கியம்?

அனுபல்லவி

            விண்ணவரும், புவிமேவும் முனிவர்களும்,

            மன்னவருங் காணா மகிபனை யான் கண்டேன்; - என்ன

சரணங்கள்

1.         வானகந் தானோ,-அல்லதிது-வையகந் தானோ?

            ஆனகம்[1] சென்று எழுந்த அரும்பொருள்

            கானகந் தன்னில் என் கையில் அமர்ந்தது; - என்ன

2.         போதும் இவ்வாழ்வு;-பரகதி-போவேன் இப்போது;

            ஏதேன் என்ற பரதீசும் வந்திட்டது;

            எண்ணில்லாத செல்வம் என் கையில் கிட்டுது; - என்ன

3.         சாமியைக் கண்டேன்,-மகானந்தம் சாலவுங்கொண்டேன்,

            காமரு தேங்கனி[2] வாய்கள் துடிப்பதும்,

            கண்ணும் மனமும் களிக்க விழிப்பதும்;  - என்ன

4.         அன்னமும் நீயே;-கிடைத்தற்கருஞ்-சொன்னமும்[3] நீயே;

            மின்னறு மேகத் திருக்கை துறந்தையோ?

            மேதினி தன்னை ரட்சிக்கப் பிறந்தையோ? - என்ன

- காபிரியேல் உபதேசியார்

---

[1]. தொழுவம்

[2]. இனிய கனி

[3]. தங்கம்