ஜகநாதா குரு பரநாதா

ஜகநாதா குருபர நாதா

41. (88, 89) சங்கராபரணம்                              ஆதிதாளம்

பல்லவி

                         ஜகநாதா, குரு பரநாதா, திரு

                        அருள் நாதா, ஏசுபிரசாதா நாதா!

அனுபல்லவி

                        திகழுறுந்[1] தாதா, புகழுறும் பாதா,

                        தீதறும் வேத போதா! - செக

சரணங்கள்

1.         முற்காலம் ஆதிமைந்தர் மோசப் பிசாசு தந்திர

            மொய்[2] கொண்டு கனியுண்ட பழியாலோ?

            நற்காலம் நீ தெரிந்து, நவின்ற வண்ணம் பரிந்து,

            நரதேவனாக வந்தாய் மொழியாலோ? - ஜகநாதா

2.         எளிய வேஷந் தரித்தே இங் கவதரித்தாலும்,

            இமையோர் வந்திறைஞ்சிடத் தெரிந்தாயே;

            ஒளிசெய்யும் பணிமுடி உயர் மன்னர் தொழும்படி

            உடு[3] வழி காட்டிடப் புரிந்தாயே. - ஜகநாதா

3.         அருந் தவன்[4] கையில் தங்கி, அன்பின்பக் கடல் பொங்கி,

            ஆலயத்தில் துதிக்க களித்தாயே,

            வரும் தவ மதியால் முன் மற[5] மன்னன் தேடிட, உன்

            மலர் முகங் காட்டாமல் ஒளித்தாயே. - ஜகநாதா

4.         மக்கள் உளக் களங்கம் மாசற்றொளி விளங்க,

            மதுரப்பிரசங்கம் யார்க்கும் உரைத்தாயே;

            சிக் கடர் துன் மனத்தைத் திருத்தி, அறத்தின் வித்தை

            திருத் தயை கூர்ந் தெவர்க்கும் விதைத்தாயே. - ஜகநாதா

5.         தனையர் வல் நோயைக்கண்ட தாயார் மருந்துட் கொண்ட

            தகைமை எனப் பேரன்பு கூர்ந்தாயே;

            வினையர் வெம் பாவக் கேடு விலக அரிய பாடு

            மேவி அனுபவிக்க நேர்ந்தாயே. - ஜகநாதா

6.         அமரர்[6] முற்றும் அறியார், அடிகள்[7] சற்றும் அறியார்,

            ஆர் உன் திறல்[8] அறிவார், கர்த்தாவே?

            எமது பவம் பொறுத்தே, இரக்கம் எம்மேல் உகுத்தே,

            எமைப் புரந்தாளும், மானப் பர்த்தாவே. - செகநாதா

- வீரமா முனிவர்

---

[1]. பிரகாசமுள்ள

[2]. பெருமை

[3]. நட்சத்திரம்

[4]. சிமியோன்

[5]. கோபமுள்ள

[6]. தூதர்கள்

[7]. திருப்பாதங்கள்

[8]. வலிமை