வேறு ஜென்மம் வேணும் மனம்

வேறு ஜென்மம் வேணும்

143. (154) உசேனி                                         ரூபக தாளம்

பல்லவி

                   வேறு ஜென்மம் வேணும்,-மனம்

                   மாறுதலாகிய உள்ள சுத்தி என்னும்

சரணங்கள்

1.         கூறு பரிசுத்தர் மாறிலா தேவனின்

             தேறுதலான விண்பேறு பெற இங்கே; - வேறு

2.         பாவசுபாவமும் ஜீவியமும் மாறத்

             தேவனின் சாயலை மேவுவதாகிய; - வேறு

3.         மானிடரின் அபிமானத்தினாலல்ல,

             வானவரின் கிருபா தானமாய் வரும்; - வேறு

4.         ஒன்றான ரட்சகர் வென்றியை நம்பி,

             மன்றாடுவோருக்கு ஒன்றுவதாகிய; - வேறு

5.         மைந்தர் கெடாமல் உகந்து ஈடேறவே,

            சொந்த மகன்தனைத் தந்த பிதா அருள்; - வேறு

6.         மண்ணினில் பத்தராய் நண்ணி நடக்கவும்,

            விண்ணினில் தூயராய் தண்ணளி[1] கொள்ளவும்; - வேறு

- த. யோசேப்பு

---

[1] கருணை