குணப்படு பாவி தேவ

குணப்படு பாவி

148. (169) உசேனி                                         ரூபக தாளம்

பல்லவி

                        குணப்படு, பாவி; தேவ

                        கோபம் வரும் மேவி-இப்போ.

அனுபல்லவி

            கணப்பொழுதினில் காயம் மறைந்துபோம்;

            காலமிருக்கையில் சீலமதாக நீ. - குணப்படு

சரணங்கள்

1.         கர்த்தனை நீ மறந்தாய்,-அவர்

            கற்பனையைத் துறந்தாய்,

            பக்தியின்மை தெரிந்தாய்,-பொல்லாப்

            பாவ வழி திரிந்தாய்,

            புத்திகெட்ட ஆட்டுக் குட்டியே ஓடிவா,

            உத்தம மேய்ப்பனார் கத்தி யழைக்கிறார். - குணப்படு

2.         துக்கமடையாயோ?-பாவி

            துயரமாகாயோ?

            மிக்கப் புலம்பாயோ?-மனம்

            மெலிந்துருகாயோ?

            இக்கணம் பாவக் கசப்பை யுணராயோ?

            தக்க அருமறைப் பக்கந் தொடராயோ? - குணப்படு

3.         தாவீ தரசனைப்போல்,-தன்னைத்

            தாழ்த்தும் மனாசேயைப்போல்,

            பாவி மனுஷியைப்போல்,-மனம்

            பதைத்த பேதுருபோல்,

            தேவனுக்கேற்காத தீமைசெய்தேனென்று

            கூவிப் புலம்பு நல் ஆவியின் சொற்படி. - குணப்படு

4.         உன்னை நீ நம்பாதே!-இவ்

            வுலகையும் நம்பாதே;

            பொன்னை நீ நம்பாதே;-எப்

            பொருளையும் நம்பாதே;

            தன்னைப் பலியிட்டுத் தரணி மீட்டவர்

            நின்னையும் ரட்சிப்பார், அனைவரைப்பற்று - குணப்படு

- ஞா. சாமுவேல்