ஜென்மமார் கருவிலே வினைவிடம்

நன்மையேனுஞ்செயத் திறனிலேன்

153. நவரோஜ்                                                         சாபு தாளம்

1.         ஜென்மமார் கருவிலே வினைவிடம்[1] தீண்டலால்

            நன்மனோ தத்துவ நாசமா யினவெலாந்

            தின்மையே செயவருந் திறனுளேன், சிறியவோர்

            நன்மையே னுஞ்செயத் திறனிலேன், நவையினேன்.[2]

2.         நான்பிறந் ததுமுயிர்ச் சுமையினா னலியவோ

            கான்பிறங் கலினுறுங் கதழ்விடப்[3] பாந்தளில்[4]

            ஊன்பிறங் குடல்வளர்த் துழலுவேன், உணர்விலேன்,

            ஏன்பிறந் தேன்கொலாம் ஏழையிவ்வுலகினே?

3.         அன்னையாய் அப்பனாய் அன்றுதொட் டின்றுமட்-டு

            என்னையாய் பொடுபுரந் தென்றுநன் றேதரும்

            தன்னையே நிகர்வதோர் தம்பிரான் தயைமறந்-து

            என்னையே முப்பகைக் கீடழித் தினைகுவேன்.[5]

4.         ஓரணுத் துணையுநல் லுணர்விலேன் உலகுசெய்

            கோரணிக்[6] குளமுடைந் திடையுமோர் கோழையான்,

            ஆரணத் துரைபடிந் தயர்வுயிர்த் திலனினி

            மாரணக்[7] கடல் குளித் தயர்வனோ மதியிலேன்?

5.         எப்பெரும் பதகரும்[8] இதயநொந்; தேங்கிவந்-து

            அப்பனே பிழைபொறுத் தருளு மென் றடையிலோர்

            ஒப்பரும் புதல்வனுக் குருகிமன் னிப்பமென்-று

            இப்பெருஞ் சுருதிதந் திறைமறந் திடுவரோ?

- எ.ஆ. கிருஷ்ணப்பிள்ளை

---

[1] விஷம்

[2] குற்றமுள்ளேன்

[3] கோபிக்கும் விஷமுள்ள

[4] பாம்பைப்போல

[5] அழுவேன்

[6] பாசாங்கு

[7] மரண

[8] சண்டாளரும்