ஆ! நேசம் தனை அற்றவன்

309. மலையாமி                      திரசு தாளம் (290)

பல்லவி

                   ஆ! நேசம் தனை அற்றவன் ஏன் பிறந்தான்?

                   மாதோஷம் அவன் வாழ்க்கை நிலையாதே

                        ஓ மோசம் அவன் ஊதியம் தான் அவமே

1.         கண்ட சகோதரன் மேல் அன்பு கூராத

            கன்னெஞ்சனானவன் தான் - காணா

            அண்டர் கோமனை அறிந்தவரில் அன்

            படைகுவதெப்படியோ

2.         உற்ற சகோதரன் தன்னைப் பகைத்தவன்

            ஓர் கொலைகாரன் என்றே - வேதம

            குற்றி உரைப்பதினால் அவனைப் பழி

            கூடத்தொடர்ந்திடுமே

3.         கூடிக்குலாவி இருக்கும் சகோதரர்

            கொள்ளும் இனிமையதை - பகை

            மூடிப்பிரிந்து கலகம் புரிகின்ற

            மூர்க்கன் உணரானே

4.         ஆறுதலில்லை அமைதலுமில்லை அன்

            பற்றவன் உள்ளமதில் - மிகு

            தாறுமாறாக பல பல எண்ணங்கள்

            தாக்கி உலைத்திடுமே

5.         சாவு வரையில் பகையில் நிலைக்கும்

            தருகணன் பேர் கெடுமே - அவன்

            ஆவி பிரிந்த பிற்பாடும் எரி நர

            காக்கினை சூழ்ந்திடுமே

6.         இப்படி நேசமிலான் நிருவாகம்

            இருக்க முயற்சியுடன் - அன்பு

            துப்புரவும் மாயம் அற்றதுமாகத்

            துலங்க வகை பாரும்

7.         பூரண நேசம் பயத்தைச் சரிவர

            போக்கடிக்கும் அதனை - சற்று

            நேரம் அல்ல நீர் எந்நேரமுமுற்று

            நிலைக்க வகை பாரும்

8.         வேதம் முழுவதும் ஓதும் அன்பானதில்

            வீற்றிருக்கின்றதினால் - அதை

            நாதனுக்கேற்க அடைந்துறவாகில் எந்

            நாளும் சுகிப்பீரே

9.         இன்புடன் யாவரும் கலந்து குலாவிட

            ஏற்ற வகை தேடும் - அதற்

            கன்பின் விருந்தை அறிகுறியாக

            அமைந்தங்கனல் மூட்டும்

10.       தேவ வசனப்படியே இவ்வாறிங்கு

            செய்ய மனமிணங்கி - அன்பை

            ஆவலுடன் குறைவின்றி அடைந்திடில்

            ஆனந்த பாக்கியமே - ஆ! நேசம்