பார்ப்பேனே என் நேசரை நான்

379.

பல்லவி

பார்ப்பேனே என் நேசரை நான்,

ஆர்ப்பரிப்பேன் கூடி யந்நாள்.

அனுபல்லவி

தீர்த்தார் என் கண்ணீரையெல்லாம்

சாற்றுவேன் நான் துதியே, துதியே. - பார்ப்பேனே

சரணங்கள்

1. பாரில் என்தன் பாவம் தீர்த்தார்,

பரத்தில் என்தன் ஆவல் தீர்ப்பார்,

அகத்திலே சந்தோசமளித்தார்,

இகத்தி லென்றும் துதியே, துதியே, - பார்ப்பேனே

2. ஆயிரங்களிற் சிறந்தோர்,

ஆத்துமாவின் நேசரவர்,

ஆபத்திலென் தோழனவர்,

நாமத்திற்கே துதியே, துதியே. - பார்ப்பேனே

3. எண்ணிறந்த தூதர் கூட்டம்

விண்ணினின்று போற்றும் நாளில்,

அண்ணல் இயேசின் அடி பணிந்து,

நின்று சொல்வேன் துதியே, துதியே. - பார்ப்பேனே

4. மண்ணின் சாயல் மாறி யானும்,

மகிமை யேறி மாசற்றோனாய்,

மன்னனோடு மணவறையில்,

மகிழ்வேன் என்றும் துதியே, துதியே. - பார்ப்பேனே

- இரத்தினம் பரதேசியார், திருநெல்வேலி.

Tamil Christian Songs