தோத்திர பாத்திரனே தேவா

தோத்திரந் துதி உமக்கே

336. (16) சங்கராபரணம்                                           ஆதி தாளம்

பல்லவி

            தோத்திர பாத்திரனே, தேவா,

            தோத்திரந் துதியுமக்கே!

            நேத்திரம்போல் முழு ராத்ரியுங்காத்தோய்;

            நித்தியம் துதியுமக்கே!

சரணங்கள்

1.         சத்துரு பயங்களின்றி,-நல்ல

            நித்திரை செய்ய எமை

            பத்திரமாய்ச்சீ ராட்டி உறக்கியே[1]

            சுற்றிலுங் கோட்டையானாய். - தோத்திர

2.         விடிந்திருள் ஏகும்வரை-கண்ணின்

            விழிகளை மூடாமல்,

            துடி[2] கொள் தாய்போல் படிமிசை[3] எமது

            துணை எனக் காத்தவனே. - தோத்திர

3.         காரிருள் அகன்றிடவே,-நல்ல

            கதிரொளி திகழ்ந்திடவே,

            பாரிதைப் புரட்டி உருளச்செய் தேகன

            பாங்கு சீராக்கி வைத்தாய். - தோத்திர

4.         இன்றைத் தினமிதிலும்-தொழில்

            எந்தெந்த வகைகளிலும்

            உன் திரு மறைப்படி ஒழுகிட எமக்கருள்

            ஊன்றியே காத்துக்கொள்வாய். - தோத்திர

- ப.ஈ. யோவான்

---

[1] உறங்கவைத்து

[2] பதைக்கிற

[3] பூமியின்மேல்